Blog

” كل يوم نصيحة في طب الأطفال” حملة توعية أون لاين 25 مارس

” كل يوم نصيحة في طب الأطفال” حملة توعية أون لاين

اطلقت مؤسسة الإغاثة والطوارئ مبادرة التوعية بطب الأطفال وحديثي الولادة تحت شعار  كل يوم نصيحة في طب الاطفال  مع د. طارق جميل استشاري طب الأطفال وحديثي الولادة
وتتناول المبادرة مجموعة من الموضوعات الهامة والأمراض التي تتعرض لها معظم الأطفال  وحديثي الولادة منها : ارتفاع درجة الحرارة لدى الأطفال، والوقاية من الفيروسات الكبدية للأطفال وحديثي الولادة، والجلسات التنفس والبخاخة لعلاج حساسية الصدرية في الاطفال ، بالاضافة الى التعامل مع نزلات البرد والنزلات الشعبية ، والكحة و التغذية والرضاعة وغيرها من النصائح الهامة للأطفال وحديثي الولادة
وتقدم هذه النصائح في شكل كبسولات صحية سريعة  لعلاج الأطفال للحد من اتجاه الامهات الي الشائعات والفتاوى الغير صحية

الموضوع الاول: ارتفاع درجة الحرارة


(1)
ارتفاع درجة الحرارة علامة صحة مش مرض معناها انك موجود وقادر تقاوم المرض
-ارتفاع دوجة الحرارة مش كله شر فيه خير كثير
-الميكروبات عشان تعيش وتتكاثر عايزة درجة الحرارة العادية عشان كدة الجسم بينتج كرد فعل ودفاع مواد ترفع درجة الحرارة في وجه الميكروبات وتحفز الجهاز المناعي.

(2)
-مافيش علاقة بين ارتفاع دوجة الحرارة وخطورة المرض يعني حضرتك ممكن تبقى دوجة الحرارة اربعين والمرض بسيط وممكن تبقى ٣٨ والمرض خطير
-ومافيش علاقة بين الاستجابة للدواء خافض الحرارة وخطورة المرض يعني حضرتك ممكن الطفل ياخد دوا خافض للحرارة والحرارة تنزل والمرض لسه موجود او مش بسيط
(3)
-في اطفال لما تسخن تتشنج مش معنى كدة انه يمشي على خافض حرارة عمال على بطال لان دا مش هيمنع التشنجات. والتشنجات دي شكلها يبقى مرعب خصوصا اول مره لكن مافيش منها خطورة على حياة الطفل ومحتاج هدوء وتعامل بحكمة

(4)
-اما ابنك يسخن ويرتعش وأطرافه تثلج وتزرق مش معنى كدة انه بردان ، وتروح ترمي علية بطاطين . دا رد فعل من الجسم بيحاول يرفع درجة الحرارة.
(5)
-لما الطفل ياخد التطعيم بتاعه بيسخن مش معنى كدة انك قبل التطعيم تعطيه خافض للحرارة لان دا ثبت انه خطأ. طعم الطفل ولو السخونة بسيطة ماتعملش حاجة لو عالية قوي ممكن تعطي بعد استشارة الطبيب.
(6)
-حضرتك كمادات المية الساقعة والخل والكحول دي من ايام الشيشم والجنية الجبس وبتجيب نتايج عكسية . ولو هتعمل كمادات تبقى بميه درجة حرارتها عادية واسقى الطفل سوائل كثير واعطية وجبات خفيفة

(7)
-الأدوية الخافضة للحرارة والمتعارف عليها علميا انها آمنه في الاطفال هي مادة الاسيتومينوفين الموجودة في الباراسيتامول ومادة الابيبروفين . وما دون ذلك لم يثبت امانه بالنسبة للاطفال كخافض للحرارة يعني معاليك الامريكان والاروبيين والكنديين وبلاد تركب الافيال ماشية كدة لكن في مصر بيحبو يجودو ويستخدمو حاجات تانية

(8)
-حضرتك لما تعطي الدواء عن طريق الفم تقدر تتحكم في الجرعة صح ولا تؤذي الطفل بجرعات غير مظبوطة عن طريق اللبوس . حضرتك ربنا خلق للانسان فم كطريق طبيعي لناول الاشياء بما فيها الدواء . خلي اللبوس لما يستحيل الفم.

(9)
-حضرتك ماينفعش تروح الاجزخانة بعد كل الكلام دا وتطلب من الصيدلي دواء او لبوس خافض للحرارة لان حضرتك ارتفاع الحرارة مش مرض دا عرض لمرض قد يكون بسيط او خطير وفي الحالتين درجة حرارة الطفل هتنزل وانت مش هتعرف السبب والنتائج ممكن تكون سيئة لتأخر التشخيص وبداية العلاج . —ماتنساش بلاش لبوس وبلاش دولفين وبلاش تروح الصيدلية وتطلب علاج بالبركة كدة.

 

الموضوع الثاني: الفيروسات الكبدية والأطفال وحديثي الولادة


(1)
-فرصة انتقال فيرس سي من الأم للطفل او نزوله في لبن الام ضعيفة جدا. تكاد لاتذكر. وكذلك فيروس بي
-يعني ايه؟ يعني حضرتك الام الحاملة لفيروس سي او بي تقدر ترضع عادي طالما ثديها سليم ومافيش جروح او تشققات في حلمة الثدي وما حولها
وفي حال وجود تشققات نوقف الرضاعة من الناحية المصابة بشكل مؤقت ونرجع نرضع منها تاني بعد الشفاء. ودا مش معناه ان نسبة انتقال الفيروس من الجروح دي عالية لكن يعني الي يتلسع من الشربة ينفخ في الزبادي

(2)
-الطفل المولود لام مصابة بفيروس بي يرضع وياخد حقنة الاجسام المناعية والجرعة الصفرية من التطعيم ضد فيروس بي خلال١٢ساعة من الولادة

(3)
-الطفل المولود لام مصابة بفيروس سي يرضع ومافيش تحاليل تتعمل له قبل سن١٨شهر لان ببساطة شديدة الاجسام المضادة قبل هذا العمر بتكون بتاع الام وليس الطفل والتحليل الوحيد الي ممكن يبين اصابة الطفل هو تحليل الفيروس PCR ومش نستفيد منه بحاجة عشان مافيش علاج في السن دا
لكن عند ١٨شهر نعمل الاجسام المضادة لو طلع ايجابي نعمل PCR
-وحتى بعد تحليل الpcr قبل سن١٢سنة مافيش علاج بس نحافظ على كبد الطفل من مسببات التليف وخاصة الادوية والمسكنات عشان يستجيب للعلاج بعد سن١٢سنة
كمان نطعم الاطفال ضد فيرس بي عشان نحسن الاستجابة لعلاج فيرس سي بعد ١٢سنة

(4)
-الام المصابة بفيرس سي توقف الرضاعة فقط عندما تبدأ العلاج من الفيرس لتجنب الآثار الجانبية للعلاج على الطفل

(5)
لو الطفل اصيب بفيرس A ودا كثير جدا في الاطفال مايخدش اي ادوية عشلن الكبد ما يتأثرش ويحصل تليف يقلل الاستجابة او يحول دون العلاج بعد سن١٢سنة.

(6)
-في حالة الاصابة بفيرس سي في الاطفال الحمد لله التحسن بيحصل لوحده في٧٥٪؜-٩٠٪؜من الحالات
-من الحاجات اللي بتأخر التحسن والاستجابة للعلاج بعد كدة الاصابة بفيروس الايدز
او امراض زي الفشل الكلوي طبعا الاصابة بفيروس بي . وحاجة مهمة جدا بقى وهي الادوية المسببة لتليف الكبد زي المسكنات وخوافض الحرارة والادوية المضادة للالتهابات والكحوليات وغيرها كثير يعرفه الأطباء

(7)
-الحمد لله نتائج العلاج بعد سن ١٢سنة تفوق٩٠٪؜القضاء على الفيروس ونسبة بسيطة بس بيرجع فيها الفيروس لا تتجاوز ال٥٪؜من الحالات

(8)
نقول تاني
نحافظ على كبد الاطفال نطعمهم ضد فيروس بي ونبعد عن الادوية المسببه للتليف عشان نعطي فرصة للشفاء والاستجابة للعلاج بعد سن ١٢سنة
ونقلل فرص حدوث مضاعافات مثل عودة المرض او الفشل الكبدي وسرطان الكبد

(9)
مصر عملت ثلاثة حاجات في منتهى الاهمية والروعة في هذا المجال
١-وفرت تطعيم ضد فيروس بي
٢-وفرت تقنية حديثة في فحص الدم ومشتقاته (NAT)ادق من تقنية الاليزا وكدة تمنع الطريق الرئيسي لنقل العدوى
٣-وفرت العلاج للحالات بالمجان وبنسب نجاح للعلاج مذهلة في الحقيقة وتعطي امل كبير ليوم تعلن فيه القضاء على الفيروس.من خلال حملة فحص وعلاج ومتابعة للحالات رائعة في الحقيقة
الكلام دا ترجمة لما سمعته من ا.د. مجد قطب بيونير امراض كبد الاطفال واستاذ طب الاطفال بكلية الطب جامعة القاهرة

الموضوع الثالث: الجلسات والبخاخة ابسط واسهل و أأمن طرق العلاج للحساسية الصدرية في الاطفال خاصة

(1)
البخاخة والجلسات محدش بيتعود عليهم
البخاخة والجلسات نعمة من عند ربنا لمرضى الحساسية الصدرية في الاطفال والكبار. حضرتك قبل ظهور العلاج بالاستنشاق عموما كان مريض الحساسية بيتعالج سنوات طويلة بأدوية عن طريق الفم ولبوس وحقن كل دا كان بيدخل جسم المريض ويهري في الكبد والكلى وكان المريض في النهاية يعاني من التأثير الضار للأدوية اكثر من معناته من المرض نفسه.
دلوقتي الادوية عن طريق الاستتشاق بالجلسات او البخاخة بتصل للرئة فقط وتمتص الى الدم بنسبه قليلة جدا ويالتالي آثار جانبية قليلة جدا.

(2)
مافيش حاجة اسمها التعود على البخاخة .حضرتك انا عندي حساسية .بتروح وتيجي اخد البخاخة ارتاح ابقى اتعودت على البخاخة؟؟ ولا المرض هو الي بيرجع والبخاخة بتعالجني
وحضرتك الحساسية مرض مزمن زي ارتفاع ضغط الدم والسكر . هو حضرتك حد بيقول مريض سكر او ضغط اتعود على العلاج.

(3)
حضرتك الجلسات والبخاخة نعمة لمريض الحساسية وخاصة الاطفال .
طيب والكرتيزون الموجود فيها؟؟
معاليك الكورتيزون دا مش سم ولا برشام صراصير . دا هرمون موجود في الجسم وعايشين به ومن غيره نموت اصلا. كل الحكاية ان لما الانسان ياخد كورتيزون لفترة طويلة وبجرعات عالية افراز الكورتيزون في الجسم يقل . والمطلوب اننا عندما نوقف العلاج به نسحبه واحدة واحدة عشان نعطي فرصة. لافرازه يزيد داخل الجسم يعني حضرتك بنخاف على المريض من نقص الكرتيزون مش العكس. حضرتك الجرعات الموجوده في البخاخات امنه جدا ومعظمها يشتغل موضعي في الرئة بس

الموضوع الرابع: دور النزلة الشعبية

(1)
(التهاب الشعب الهوائية) المنتشر هذه الأيام في الأطفال سببه فيروس RS وفيروسات اخرى . ودا زي الانفلونزا وليس له علاج مباشر وبياخد وقته ويرحل
مش محتاج مضادات حيوية ولا موسعات شعب هوائية ولا كورتيزون ولا ادوية كحة
محتاج اعطاء الطفل كمية من السوائل كافية عشان بينهج ونفسه سريع بيفقد سؤال
لو الطفل بيرضع كويس وبيرضع رضاعة طبيعية زود الرضاعة الطبيعية ودي السوائل بتاعته لو بيرضع صناعي ممكن نضيف سوائل اخرى
لو مش قادر يرضع ممكن ياخد محاليل وريد ودا في حالات قليلة
تدفئة وسوائل وسحب اي افرازات (بلغم)من الفم او الانف كفاية في معظم الحالات

(2)
حالات النزلات الشعبية مش محتاجة حجز في المستشفيات ولا تحاليل ولا اشاعات روتينية
باستثناء في حالات وجود علامات خطر
لو سن الطفل اقل من١٢اسبوع
لو الطفل مبتسر او كان مبتسر
لو الطفل وضع قبل كدة على جهاز تنفس صناعي كلي او جزئي
لو الطفل اخد اكسجين في محضن لفترة طويلة
لو الطفل عنده مشاكل في القلب
لو الطفل عنده صعف في المناعة زي اطفال متلازمة داون(المونغليزم)
لو الطفل عنده مرض وهن في العضلات او ارتخاء في العضلات
بنحجزهم لاحتياجهم لعناية خاصة
مش لازم نملى المستشفيات ونرهق الاهل بالحجز في المستشفيات .
توصيات الاكاديمية الامريكية لطب الاطفال. الصادرة في مارس ٢٠١٨ اخر تحديث بتقول كدة

الموضوع الخامس: على فكرة بقى مافيش مرض اسمه الكحة

(1)
مافيش مرض اسمه الكحة ولا دوا اسمه دوا كحة والكحة علاج وليست مرض ودا عندنا في طب الاطفال على الاقل
ومافيش حاجة اسمها عدي على الاجزخانه وهات معك دوا كحة عشان العيال . دا مش كريب ولا بيتزا يا حاج .
الكحة اصلا علاج وليست مرض الكحة رد فعل لحماية صدر الانسان يعني حضرتك لما ابنك يكح . بندور على سبب للكحة ونعالجة
يعني حضرنك لو عندك حنفية بايظة في البيت ومغرقة الدنيا بتجيب خيشة وتقعد تحت الحوض تلم المية ولا تصلح الحنفية؟؟
احنا بنعالج سببب الكحة بنصلح الحنفية حضرتك.

(2)
الكحة جرس انذار و الطبيب بيدور على السبب ويعالجة برد حساسية انف .حساسية. صدر التهاب رئوي وكل حاجة ولها علاج
مش لازم اول ما تدخل على الطبيب تقوله اهم حاجة الكحة تروح و وانت خارج من حجرة الكشف تسأله كتبت دوا كحة،؟
وتروح الاجزخانة وتقول للصيدلي هو كتب دوا كحة؟
وترجع للدكتور بالعلاج ويشرح لك بيتاخد ازاي وتعمل له كمين وتقول اه فين دوا الكحة بقاااااااا
ومش لازم يا دكتور والعيان خارج. من الحجرة تقول له،،،.كتبتلك دوا كحة كدة👍
حضرتك سيبه يكح
كنت سبيه يكح يا فوزية #بصوت_فؤاد المهندس

(3)
وانت يا زميل بلاش تملى الكيس وتنوع دوا ولبوس كحة
كل ادوية الكحة لو ماعالجتش السبب تبقى كوسكسي على حمصي.
الكحة ياسلام عى الكحة هو في زي الكحة؟
سامعك يا مندوب شركة دوا الكحة وانت راكب التوكتوك وانت متغاظ من البوست وبتدعي وتقول كحة لما تفرتك ضلوعك يا بعيد😂 عايزين ناكل عيش

الموضوع السادس: نصائح للاطفال حديثي والولادة

(1)
يا بيه الواد عنده اسبوع وسرتة ماوقعتش
عادي ياماما ومعك لحد شهر او اربعين يوم
بس دي زمان كانت بتقع على الاسبوع بالكثير؟؟
اوووههو كان زمان يا حاجة السرة بتاع اليومين دول حاجة تانية😁

(2)
-سرة المولود ممكن تقعد من ٣-٤٠يوم طالما ناشفة ومافيش اي التهابات حولها مافيش مشكلة
-سرة ابنك ماتحطيهاش تحت الكادليز عشان ماتتلوثش بالبول وتعفن

(3)
-مشبك السرة قيمته اول كام ساعة عشان يمنع النزيف يعني ممكن نشيله تاني يوم عادي ماهوش بركة ولا يتحط في حجاب

(4)
مطهر السرة يجب يكون كحول ٧٠٪؜ مش بتادين
-البتادين بيأثر على وظيفة الغدة الدرقية في الطفل

(5)
-ابنك بيحزق ويتلوى ولونه يتغير مع اليول ومع البراز وحتى وهو نايم يتحزق شوية ويكمل عادي طالما بيرضع كويس ووزنه طبيعي وبيزيد زيادة طبيعيةمافيش مشكلة

(6)
-ابنك بيعمل براز كل يوم ١٥مرة او مرة كل ١٥يوم مافيش مشكلة وممن شويه كدا وشوية كدا طالما بيرضع كويس ووزنه بيزيد طبيعي . ودا طبعا يقرر بعد زيارة الطبيب لاستبعاد الحالات المرضية ومش في اول شهر بعد الولادة .
-يعني ابنك مايخدش لبوس ولا صابون ولا ورقة بزيت عن طريق الشرج ولا ملينات بالفم

(7)
-ابنك برازه اصفر او اخضر او اصفر على اخضر مافيش مشكلة طالما بيرضع كويس ووزنة بيزيد طبيعي
-ابنك بوله بيعلم في الكادليز وبيسي لون احمر دا مش دم ولا لون الدم دا لون وردي كدة دي شوية املاح منرسبة عادي ومافيش مشكلة اول كام يوم

(8)
-ابنك ساعات نفسه يبقى سريع جدا وساعات يبقى بطئ جدا دا طبيعي في الشهور الاولى طالما بيرضع كويس ووزنه بيزيد
-ابنك بطنة مشتحة و طالعة نازلة مع النفس دا طبيعي طالما بيرضع كويس ووزنه بيزيد لانه بيتنفس بالحجاب الحاجز وعضلات بطنة
(9)
-ابنك بيخنخن بيعمل صوت بانفه وهو صاحي وهو نايم مش مهم طالما بيرضع كويس ووزنه بيزيد لما دا يأثر على الرضاعة او النوم نستخدم محلول ملح وبخاخات ماء بحر لتسليك الانف.مافيش حاجة اسمها لحمية كاذبة

(10)
-التوبرين والتوبرال مش قطرة حديثي الولادة
-ابنك عنيه بتحول عادي لحد ٦شهور
-ابنك لون عنيه بيتغير في اول ٤شهور عادي
وفصيلة دمه كمان ممكن تتغير 😁

(11)
حقنة فيتامين ك مش حقنة الصفرا ولا لها دعوة بالموضوع وانبك ياخدها لمنع مرض نزف الاطفال حديثي الولادة

(12)
-ابنك يستحمى كل يوم في الصيف ويوم بعد يوم
في الشتا

(13)
الواد عنده اربع شهور ومابيقفش يا دكتور ؟ عادي يا حاجة انا وانا قده ماكنتش باقف ودلوقتي زي ما انت شايفة واقف طول النهار لما جاتلي دوالي.😁😊
السن الرسمي للوقوف سنة قبل كدة مش وقوف دا عرقصة وشد والي يشد يشد والي يرخي يرخي
المهم عند سن سنة نقف

(14)
-حاجة لبنتك بقى
بنتك لو جابت شوية افرازات مخاطية او دم من روحها من امام دا من تأثير هرمونات الحمل بتاع الام وهيروح عادي
-بنتك في حاجة طالعة منها من قدام زي لحمية كدة . عادي بردو وهتروح مع الايام
-بنتك او ابنك ثديه او ثديها كبير شوية وبينزل لبن. بردو عادي ويروح مع الايام اهم حاجة ماحدش يعصر الثدي عشان ما يلتهبشي ويقب خراج والثدي يبوظ في البنات

الموضوع السابع: الرضاعة والأكل

(1)
العيال ترضع طبيعي ٦شهور وتاكل في اول السابع ونبدأ سوائل ثم اكل مضروب في الخلاط حتى نصل لأكل مهروس عند ٩شهور
ممكن في ظروف استثنائية ننزل بالسن لأربع شهور.بالذات لو الرضاعة مش طبيعية لكن ماتأخرش ابدا في الاكل بعد ٦شهور
(2)
الخضار طعمه مش حلو نبدأ به بدري في السابع
لازم نصل للتاسع بناكل خضر كويس
لو اخرنا في اكل الخضار والطفل اكل حاجات طعمها افضل مش هيحب الخضار حتى وهو سنه كبير

(3)
واحنا بنعطي حبوب في اول السابع ناخد بالنا ان اللبن عليها مايكونش لبن حليب حتى لو منزوع الدسم لان مشاكل اللبن الحليب مش بس في الدهون
يفضل حبوب معمولة بلبن اطفال او ماء

(4)
الزبادي لحد النصف الاول من ٢٠١٨ كان الكلام انه بعد سنة زي اللبن الحليب . لكن نزلنا بالسن الي ٦شهور. وفي كلام جديد لما يصل لمستوى التوصية هنقوله

(5)
السكر والملح مش محبذين قبل سن سنة
العسل النحل بلاش بردو قبل سن سنة
طبعا كل دا مع متابعة مع طبيب
(6)
السمك يا جماعة
يعني نظر ومخ وقلب واوعية دموية ومناعة يعني سمك. الناس فاهمة ان الحاجات دي للعواجيز لا دي لحديثي الولادة كمان -اكلو الحوامل سمك في الثلث الاخير من الحمل وفترة الرضاعة .ولا تؤخرو اكل السمك بالنسبة للاطفال ثبت ان دا مش يمنع حدوث الحساسية عند من عندهم الاستعداد ولكن سيحرم الاطفال من فوائد LC-PUFA للمناعة والنظر والمخ والاعصاب والقلب ويقلل حدوث التهابات الرئة المزمنةchronic lung disease والتسمم الدموي عند الاطفال حديثي الولادةneonatal sepsis والتهاب الامعاءNEC necrotizing
enterocolitis عند الاطفال ناقصي النمو أكلو الامهات الحوامل سمك مرتين في الاسبوع وكذلك الاولاد احتياج الاطفال بعد سن سنتين هو نفس احتياج الكبار 250 mg من LC-PUFA في اليوم
(7)
مش دوا فاتح للشهية😩
بالمناسبة مافيش حاجة اسمها دوا فاتح شهية في الاطفال اصلا . الام هي فاتح الشهية اكل الاطفال شطارة امهات .مافيش طفل بياكل في ام بتأكل ابنها . تلعب تغني تحايل وطبق شكله حلو وفي وقت مناسب للطفل وتاكل الطفل اكل يكون بيحبه
مافيش اكل بالعافية ولا تظغطة زي دكر الوز بتاع توفيق عكاشية
مافيش حاجة اسمها تاخدي ابنك على حجرك وقت اكلك وانت مرهقة وتعبانة وجعانة وتاكليه ماياكلش تتطنشيه وتاكلي انت#اكلني_ياسيعبعال،،
خضرتك كلي واشبعي واحبسي يالحلو والمشروب المفضل
وحضري طبق الطفل واقعدي اكليه.

(8)
الواد يدخل العيادة بكيس الشبشي ومظروت نفسه واقعد انتظر بقه يفضى عشان اكشف عليه و رائحة الشبسي خانقاني والجيوب الانفية على الاخر
او ماسك سندوتش كبدة من عند ابو ندا . وبيعرط فيه …اه هي اسمها كدة …يعرط … وامه ماسكة له كيس المخلل وتلقمه.،،،،،اه تلقمه ،،، بتتقال كدة ،،المخلل حته حته كدة بين القطمات زي الفواصل الاعلانية بين الفقرات . وتحسسك كدة ان الماكينة طلعت قماش .. طلعت قمااااااش ،،،بصوت فؤاد المهندس. والواد يشد في القطم وكأن بينه وبين السندوتش تار وبينتقم منه 😩وخط سيره مرسوم ببقايا الفلفل والكبدة وفتافيت العيش من عند ابو ندا لحد سرير الكشف ويظروت السرير والسماعة ويعبث بالاشياء على مكتبي والحجرة كلها تبقى كبدة
ويأتي السؤال بصوت خافت دكتور الواد دا مابياكولش عايزه له فاتح شهية يكون حلو كدة؟
العيال طول اليوم تقمقم زي معيز وخرفان العرب في البراري ..اه هي تقمقم .. بتتقال كدة… واهلهم عايزينهم ياكلو وقت ما هم عايزين
لمو عيالكم ونظمو وجباتهم واحسنو تقديم الطعام لهم بصرف النظر عن نوعه او سعره كام

الموضوع الثامن: الألم عند المولود / هل الأطفال يتألمون؟

(1)
الناس بتجري عملية الطهارة(الختان) للمواليد بعد الولادة مباشرة او في اول ايام بعد الولادة . وبعد اطباء النساء والولادة بيطاهر المولود قيل ما يخرج من حجرة العمليات وبدون مسكن. على اساس ان الاطفال في هذا السن احساسهم بالالم ضعيف او مش موجود.
انا مش عايز اصدمكم ولا الومكم بس عايز اقول لكم ان الاحساس بالالم بيبدأ في الاسبوع السابع من الحمل!! تخيل؟؟ وبيكتمل عند سن ٢٠-٢٤اسبوع
يعني كل المواليد كاملين او مبتسرين عندهم احساس بالالم لا وكمان بعض الدراسات بتقول ان احساسهم اعلى من الكبار
-الملفت للنظر انه يطاهر الولد من غير مسكن ولا بنج وبعد الطهارة بكتب له مسكن😊والحقيقة ان الالم الحقيقي هو اثناء الجراحة وليس بعدها

(2)
اخوانا الزملاء في الحضانات واحنا طول اليوم بنسحب عينات ونركب كانيولات وقساطر سرة و وريد وانابيب حنجرة تخيل كل دا مؤلم جدا واحساس المولود به عالي جدا اكبر من احساسنا.
واحنا نسأل نفسنا الطفل نبضه سريع ونفسه عالي او يقف ويرجع تاني وعمال تركيز اكسجينه يقع ويعلى تاني دا كله من الضغط على الطفل بتدخلات مؤلمة.
-بس شوف بقى الجمال واعرف ان بحاجات بسيطة ممكن تخفف كثير من الالم للطفل
-ان ملامسة الجلد بالجلد وبالذات بين الطفل وامه
والرضاعة الطبيعية لها تأثير مسكن للالم عالي جدا يبدأ بعد ثواني من بداية الرضاعة الطبيعية
دراسات اتعملت وجدو ان ملامسة الجلد لها تاثير مسكن بنسبه ٨٢٪؜ يزيد الى ٩٠٪؜مع اضافة الرضاعة الطبيعية الدراسة اتعملت على سحب العينات من كعب الرجل للطفل
(3)
الجلكوز والسكروز المركز. لو وضع في فم الطفل له تأثير مسكن عالي جدا والاكاديمية الامريكية لطب الاطفال بتعمل برتوكول لعلاج الالم في الاطفال حديثي الولادة وبتحط جرعات سكروز حسب العمر الرحمي للطفل#عالم_تاني

(4)
-ساعات في الحضانات كان الطفل يبقى بيصرخ ويبكي ومجرد ما يطلع لامه ترضعه يسكت وينشط واحنا نقول اصله كان جعان والموضوع اصلا تسكين الم عند الطفل لمجرد الملامسه والرضاعة وضم الطفل لا علاقة له بالشبع وعشان كدة لما رضعو الاطفال لبن او جلكوز عن طريق انبوبة تغذية لم يزول الالم وظل بكاء الطفل والمه.
(5)
-تخيل ان مجرد لف الطفل في بطانية او ضمادة ناعمة له تاثير مسكن للالم !!! ودا معروف من زمان واسمة القماط (Swaddling ) عند العرب وانا شوفته في دولة المغرب في احد الزيارات
-طيب تخيل مجرد وضع حلمة ببرونة او تاتينة في فم الطفل له ااثير مسكن للالم
-و طبعا في ادوية وعقاقير تستخدم بمعرفة الاطباء موضعيه وغير موضعية يعرفها الاطباء

(6)
-ياريت لما تعمل اي تدخل مؤلم للاطفال حديثي الولادة
-نلف الطفل ماعدا للجزء المستخدم من جسمه
-ناخد العيانات او نعطي الحقن والتطعيمات والطفل محمول على صدر امه وملفوف و جلده ملامس لجلد امه وبيرضع
-او نضع في فمه تيتينة او حلمة ببرونة عليها جلكوز مركز
جربوها يا دكاترة لأننا هنتحاسب على ألم الاطفال دي مافيش حاجة اسمها عملية طهارة لطفل في اي سن من غير مسكن قوي موضعي على الاقل.
(7)
شوف كدة يابيه الواد دا؟ الملايكة مطاهراه.
يا حاجة دا بيبقى الجلدة ناقصة وفتحة البول ساعات بتكون مش في مكانها وتبقى مشكلة وتحتاج عملية
اهو يا حاجة الجلدة ناقصة بس فتحة البول في مكانها الطبيعي قدام اهيه.
شوفت بقى يا دكتور الفتحة في مكانها يبقى الملايكة مطاهراه.
يا حاجة الملايكة مش حلاقين ولا فاضيين يطاهرو العيال

تتقدم مؤسسة الإغاثة والطوارئ بالشكر العميق والامتنان للدكتور طارق صبحي استشاري طب الأطفال وحديثي الولادة على هذا المجهود الجبار في نشر ثقافة التوعية الايجابية بعلاج  الاطفال وحديثي الولادة والبعد عن الشاعات والوصفات الغير طبية من خلال حملة التوعية

كل يوم نصيحة في طب الاطفال

ونتقدم بالشكرا ايضا لمتابعي  الحملة على صفحة المؤسسة

print
Print Friendly, PDF & Email

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

single.php